ന്യൂഡൽഹി: രാജ്യത്തിന്റെ ഭാവി നിർണയിക്കുന്ന വിദ്യാർഥികൾക്ക് നേരെയുണ്ടായ അനീതിക്കെതിരെ ഭരണകൂടത്തെ ഭയക്കാതെ ഒരുകൂട്ടം യുവാക്കൾ തെരുവിലിറങ്ങിയപ്പോൾ ഡൽഹി സാക്ഷ്യം വഹിക്കുന്നത് സമാനതകളില്ലാത്ത പ്രക്ഷോഭങ്ങൾക്ക്. നീറ്റ് പരീക്ഷാ ചോദ്യപേപ്പർ ചോർച്ച സംബന്ധിച്ച വിഷയത്തിൽ ‘കോക്രോച്ച് ജനതാ പാർട്ടി’ (CJP) അഥവാ ജെൻസിക്കാരുടെ നേതൃത്വത്തിൽ ആരംഭിച്ച സമരം ഇന്ദ്രപ്രസ്ഥത്തെയാകെ ഉലച്ചുമറിച്ചിരിക്കുകയാണ്.
സമരത്തിന്റെ തുടക്കവും പാർലമെന്റ് മാർച്ചും
ചോദ്യപേപ്പർ ചോർച്ചയിൽ ധാർമിക ഉത്തരവാദിത്വം ഏറ്റെടുത്ത് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കുക എന്ന ആവശ്യവുമായി ജൂൺ ആറാം തീയതിയാണ് ജന്തർ മന്ദറിൽ സമരം ആരംഭിച്ചത്. ഇതിന്റെ ഭാഗമായി നിരാഹാര സമരം കിടന്ന പരിസ്ഥിതി പ്രവർത്തകൻ സോനം വാങ്ചുക്കിനെ 22-ാം ദിവസം പോലീസ് ബലംപ്രയോഗിച്ച് ആശുപത്രിയിലാക്കി. ഇതിനുപിന്നാലെ തിങ്കളാഴ്ച സി.ജെ.പിയുടെ നേതൃത്വത്തിൽ യുവാക്കൾ നടത്തിയ പാർലമെന്റ് മാർച്ച് വലിയ സംഘർഷത്തിലാണ് കലാശിച്ചത്.
മുദ്രാവാക്യം വിളികളുമായി ആയിരങ്ങൾ പാഞ്ഞടുത്തതോടെ സുരക്ഷാകാരണങ്ങളാൽ പാർലമെന്റിന്റെ മുഴുവൻ കവാടങ്ങളും മൂന്നുമണിക്കൂറിലേറെ അടച്ചിട്ടു. 2001-ലെ ഭീകരാക്രമണത്തിനുശേഷം ആദ്യമായിട്ടായിരുന്നു ഈ നടപടി. പിന്നീട് റെയിൽഭവന് സമീപം പോലീസ് കണ്ണീർവാതകവും ലാത്തിച്ചാർജും പ്രയോഗിച്ചാണ് പ്രതിഷേധക്കാരെ തുരത്തിയത്. ജന്തർമന്തർ, പാർലമെന്റ് പരിസരങ്ങളിൽ ഇന്റർനെറ്റ് സേവനങ്ങളും സർക്കാർ നിർത്തിവെപ്പിച്ചു.
‘എന്നെ അടിക്കൂ സാർ’: വൈറലായി വീഡിയോ
ലാത്തിച്ചാർജിനിടെ നാഗ്പുരിൽനിന്ന് സമരത്തിനെത്തിയ ഭരത് എന്ന യുവാവിനെ പോലീസ് വളഞ്ഞിട്ട് മർദിക്കുന്ന വീഡിയോ സാമൂഹികമാധ്യമങ്ങളിൽ വൈറലായി. ‘മുജേ മാരോ സാർ’ എന്ന് ഉച്ചത്തിൽ വിളിച്ചുപറഞ്ഞുകൊണ്ട് തന്നെ അടിക്കാൻ പറയുന്ന യുവാവിനെയാണ് ദൃശ്യങ്ങളിൽ കാണുന്നത്. ഇരുപതോളം ഉദ്യോഗസ്ഥർ ചേർന്ന് തന്റെ ശരീരത്തിൽ ഓരോ ഇഞ്ചിലും മർദിച്ചെന്ന് ഭരത് പ്രതികരിച്ചു.
പിന്തുണയുമായി കോൺഗ്രസ്
സി.ജെ.പിയുടെ ഈ യുവജന പോരാട്ടം വിഷയത്തിൽ ഇടപെടാൻ കോൺഗ്രസിനെയും നിർബന്ധിതരാക്കി. പാർലമെന്റ് മാർച്ചിൽ പങ്കെടുത്ത വിദ്യാർഥികളെ തല്ലിച്ചതച്ചതിനെതിരെ ചൊവ്വാഴ്ച പ്രധാനമന്ത്രി നരേന്ദ്ര മോദിയുടെ ഔദ്യോഗിക വസതിക്ക് മുന്നിൽ കോൺഗ്രസ് വലിയ പ്രതിഷേധം സംഘടിപ്പിച്ചു. ലോക്സഭാ പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിൽ നടന്ന പ്രതിഷേധത്തിൽ പ്രിയങ്ക ഗാന്ധിയും മുഖ്യമന്ത്രിമാരും മുതിർന്ന നേതാക്കളും പങ്കെടുത്തു.
തുടർന്ന് പോലീസ് ബലമായി നേതാക്കളെ കസ്റ്റഡിയിൽ എടുത്തു. രാഹുൽ ഗാന്ധിയെ വലിച്ചിഴച്ചാണ് പോലീസ് വാഹനത്തിലേക്ക് കയറ്റിയത്. ഇതിനിടെ അദ്ദേഹത്തിന്റെ മുഖത്ത് പരിക്കേൽക്കുകയും മൂക്കിൽനിന്ന് രക്തം വരികയും ചെയ്തു. രാജ്യത്തെ വിദ്യാർഥികൾ ഇത്ര വലിയൊരു പോരാട്ടം നയിക്കുമ്പോഴും വിദ്യാഭ്യാസ മന്ത്രിയുടെ രാജിയോ പ്രധാനമന്ത്രിയുടെ പ്രതികരണമോ ഉണ്ടായിട്ടില്ല എന്നത് വലിയ ചോദ്യമായി തുടരുകയാണ്. സി.ജെ.പിയുടെ ഈ സമരം സർക്കാരിന് വലിയ വില നൽകേണ്ടിവരുന്ന രീതിയിലേക്ക് മാറുമോ എന്ന് വരുംദിവസങ്ങളിൽ വ്യക്തമാകും.
