മയ്യിൽ: മയ്യിൽ ടൗണിലെ രൂക്ഷമായ ഗതാഗതക്കുരുക്കിന് ശാശ്വത പരിഹാരം കാണുന്നതിനായി ട്രാഫിക് റെഗുലേറ്ററി കമ്മിറ്റി പുതിയ പരിഷ്കാരങ്ങൾ ഏർപ്പെടുത്തി. പഞ്ചായത്ത് കോൺഫറൻസ് ഹാളിൽ നടന്ന യോഗത്തിൽ പ്രസിഡന്റ് സി.സി. വിനോദ്കുമാർ മാസ്റ്റർ പരിഷ്കാരങ്ങളുടെ ഉദ്ഘാടനം നിർവ്വഹിച്ചു. വരും മാസം 15-ാം തീയതി മുതൽ പുതിയ നിയന്ത്രണങ്ങൾ ടൗണിൽ പ്രാബല്യത്തിൽ വരും.
പഞ്ചായത്ത് സെക്രട്ടറി എം.എസ്. കാർത്തിക കൃഷ്ണൻ അധ്യക്ഷത വഹിച്ച യോഗത്തിൽ അസിസ്റ്റന്റ് സെക്രട്ടറി ദിവാകരൻ കോട്ടൂർ പദ്ധതി വിശദീകരിച്ചു. ടൗണിലെ അശാസ്ത്രീയമായ പാർക്കിംഗ് നിയന്ത്രിക്കുക, ബസ്സുകളുടെ സ്റ്റോപ്പുകൾ ക്രമീകരിക്കുക തുടങ്ങിയ സുപ്രധാന തീരുമാനങ്ങളാണ് യോഗത്തിൽ കൈക്കൊണ്ടത്.
വില്ലേജ് ഓഫീസർമാർ, മോട്ടോർ വെഹിക്കിൾ വകുപ്പ് ഉദ്യോഗസ്ഥർ, പോലീസ് പ്രതിനിധികൾ, വ്യാപാരികൾ, തൊഴിലാളി സംഘടനകൾ, ഓട്ടോ-ടാക്സി യൂണിയൻ പ്രതിനിധികൾ തുടങ്ങിയവർ യോഗത്തിൽ പങ്കെടുത്തു. എല്ലാവരുടെയും സഹകരണത്തോടെ ടൗണിലെ ഗതാഗത തടസ്സം പൂർണ്ണമായും നീക്കാനാണ് ഭരണസമിതി ലക്ഷ്യമിടുന്നത്.
