നമ്മുടെ ചില ശീലങ്ങൾ ശരീരത്തെ എങ്ങനെയൊക്കെ ദോഷകരമായി ബാധിക്കുന്നുവെന്ന് ഡോ. സൗരഭ് സേഥി വിശദീകരിക്കുന്നു. പ്രധാനമായും ശ്രദ്ധിക്കേണ്ടവ:
• മൂത്രം പിടിച്ചുവെക്കുന്നത്: ഇത് മൂത്രസഞ്ചിയിൽ ബാക്ടീരിയകൾ പെരുകാനും മൂത്രാശയ അണുബാധയിലേക്കും നയിക്കും. സ്ത്രീകളിലാണ് ഇതിനുള്ള സാധ്യത കൂടുതൽ.
• ടോയ്ലറ്റിലെ ദീർഘനേരത്തെ ഇരുത്തം: മൊബൈൽ ഫോണുമായി ടോയ്ലറ്റിൽ ദീർഘനേരം ഇരിക്കുന്നത് മലാശയത്തിലെ ഞരമ്പുകൾക്ക് സമ്മർദം കൂട്ടുകയും മൂലക്കുരുവിനും ദഹനപ്രശ്നങ്ങൾക്കും കാരണമാവുകയും ചെയ്യും.
• ഭക്ഷണം കഴിക്കുന്ന രീതി: ഭക്ഷണം വേഗത്തിൽ കഴിക്കുന്നത് ദഹനം തകരാറിലാക്കാനും വയർ വീർക്കാനും അമിതഭാരത്തിനും കാരണമാകും. സാവധാനം ചവച്ചരച്ച് കഴിക്കുന്നതാണ് ഉത്തമം.
• ഇടയ്ക്കിടെ മുഖം സ്പർശിക്കുന്നത്: കൈകളിലെ അണുക്കൾ മുഖത്തെത്തുന്നതിനും ചർമ്മ അണുബാധകൾക്കും ഇത് വഴിവെക്കും.
• ദീർഘനേരം ഇരിക്കുന്നത്: മണിക്കൂറുകളോളം കമ്പ്യൂട്ടറിന് മുന്നിലും മറ്റും ഇരിക്കുന്നത് കഴുത്തിനും നട്ടെല്ലിനും പേശികൾക്കും കഠിനമായ വേദനയുണ്ടാക്കും.
• ചൂടുവെള്ളത്തിലെ കുളി: അമിതമായ ചൂടുവെള്ളം ചർമ്മത്തിലെ സ്വാഭാവിക എണ്ണമയം ഇല്ലാതാക്കി ചർമ്മം വരളാനും ചൊറിച്ചിലിനും കാരണമാകും.
