ഇസ്ലാമാബാദ്: പാകിസ്താന്റെ മധ്യസ്ഥതയിൽ നടന്ന യു.എസ്-ഇറാൻ മാരത്തൺ ചർച്ചകൾ പരാജയം. 21 മണിക്കൂറോളം നീണ്ട ചർച്ചകൾക്കൊടുവിൽ ആണവായുധ വികസനവുമായി ബന്ധപ്പെട്ട വിഷയത്തിൽ തട്ടി സമാധാന കരാറില്ലാതെ യോഗം അവസാനിക്കുകയായിരുന്നു. ആണവായുധം വികസിപ്പിക്കരുതെന്ന അമേരിക്കൻ നിബന്ധനകൾ ഇറാൻ അംഗീകരിക്കാൻ വിസമ്മതിച്ചതാണ് ചർച്ചകൾ വഴിമുട്ടാൻ കാരണം.
• വാർത്താസമ്മേളനം നടത്തിയ യു.എസ് വൈസ് പ്രസിഡന്റ് ജെ.ഡി വാൻസ് ആണ് ചർച്ചകൾ പരാജയപ്പെട്ട വിവരം പുറത്തുവിട്ടത്. ഇറാനുമായുള്ള ചർച്ചകളിൽ ഉടമ്പടിയുണ്ടാക്കാൻ കഴിയാത്തതിനാൽ അമേരിക്കൻ ഉദ്യോഗസ്ഥർ മടങ്ങുകയാണെന്ന് അദ്ദേഹം അറിയിച്ചു.
• ചർച്ചകൾ പരാജയപ്പെട്ടതിന് കാരണം:
• ആണവായുധം വികസിപ്പിക്കരുതെന്ന കർശന നിബന്ധന അമേരിക്ക മുന്നോട്ടുവെച്ചു, എന്നാൽ ഇത് അംഗീകരിക്കാൻ ഇറാൻ തയ്യാറായില്ല.
• ഹോർമുസ് കടലിടുക്ക് വഴിയുള്ള ഗതാഗത അവകാശങ്ങൾ, ഇറാന്റെ ആണവ അവകാശങ്ങൾ എന്നീ വിഷയങ്ങളിൽ കടുത്ത അഭിപ്രായ വ്യത്യാസങ്ങളുണ്ടായി.
• അമേരിക്കയുടെ ‘അമിതമായ ആവശ്യങ്ങൾ’ പൊതുവായ ഒരു ചട്ടക്കൂട് രൂപപ്പെടുത്തുന്നതിന് തടസ്സമുണ്ടാക്കിയെന്ന് ഇറാൻ അധികൃതർ കുറ്റപ്പെടുത്തി.
• ചർച്ചകളിൽ പാകിസ്താന്റെ ഇടപെടലുകളെ ജെ.ഡി വാൻസ് പ്രശംസിച്ചു. അവർ മികച്ച രീതിയിൽ ഇടപെട്ടുവെന്നും, ഇരു രാജ്യങ്ങൾക്കുമിടയിലുള്ള വിടവ് നികത്താൻ പരമാവധി ശ്രമിച്ചുവെന്നും അദ്ദേഹം കൂട്ടിച്ചേർത്തു. ചർച്ച പരാജയപ്പെട്ടത് അമേരിക്കയെക്കാൾ ഇറാനെയാണ് കൂടുതൽ ബാധിക്കുകയെന്നും വാൻസ് വ്യക്തമാക്കി. അതേസമയം, ചർച്ച പരാജയപ്പെട്ടതോടെ ഇറാനും യു.എസും തമ്മിലുണ്ടാക്കിയ രണ്ടാഴ്ചത്തെ താത്കാലിക വെടിനിർത്തൽ അനിശ്ചിതത്വത്തിലായിരിക്കുകയാണ്. ഇത് പശ്ചിമേഷ്യയിൽ വീണ്ടും യുദ്ധഭീതി വർധിപ്പിക്കുന്നു.
