മയ്യിൽ: ഇടൂഴി ഇല്ലം ആയുർവേദ ഫൗണ്ടേഷന്റെയും ചാരിറ്റബിൾ ട്രസ്റ്റിന്റെയും ആഭിമുഖ്യത്തിൽ സംഘടിപ്പിക്കുന്ന 15-ാമത് ഇടൂഴി നവരാത്രി സാംസ്കാരികോത്സവം വെള്ളിയാഴ്ച (ഒക്ടോബർ 16) ആരംഭിക്കുന്നു. മയ്യിൽ ഇടൂഴി ഇല്ലം അങ്കണത്തിലാണ് പരിപാടികൾ നടക്കുന്നത്.
വൈകീട്ട് 6-ന് പ്രശസ്ത തിരക്കഥാകൃത്തും എഴുത്തുകാരനുമായ സി.വി. ബാലകൃഷ്ണൻ പരിപാടി ഉദ്ഘാടനം ചെയ്യും. ചരിത്രകാരൻ കെ.കെ. മാരാർ ചടങ്ങിൽ സാന്നിധ്യമായിരിക്കും. ഉദ്ഘാടനത്തോടനുബന്ധിച്ച് തിരുവാതിര, കീർത്തനം, കരോക്കെ ഗാനം, ഫോക്ക് ഡാൻസ്, നൃത്തസന്ധ്യ, ‘പാർവതി പരിണയം’ നൃത്തനാടകം തുടങ്ങി വിവിധ കലാപരിപാടികൾ അരങ്ങേറും.
പരിപാടികളുടെ വിശദാംശങ്ങൾ:
ഒക്ടോബർ 17 (ശനി): വൈകീട്ട് 6-ന് നടക്കുന്ന സാംസ്കാരിക സദസ്സിലും ആദര സമ്മേളനത്തിലും പ്രമുഖ മാധ്യമ പ്രവർത്തകൻ വെങ്കിടേഷ് രാമകൃഷ്ണൻ വിശിഷ്ടാതിഥിയാകും. കണ്ണൂർ സർവകലാശാല റിട്ട. രജിസ്ട്രാർ ഡോ. കെ.എച്ച്. സുബ്രഹ്മണ്യൻ ചടങ്ങിൽ പങ്കെടുക്കും. കവിയും എഴുത്തുകാരനുമായ എസ്.പി. നമ്പൂതിരി ചടങ്ങിൽ ആദരം ഏറ്റുവാങ്ങും. തുടർന്ന് വനിതകളുടെ പൂക്കളി, പരിചമുട്ട് കളി, മേള തിരുവാതിര, സിനിമാറ്റിക് ഡാൻസ്, ഭരതനാട്യം എന്നിവയും അരങ്ങേറും.
ഒക്ടോബർ 18 (ഞായർ): വൈകീട്ട് 6-ന് പുസ്തക പ്രകാശനവും സൗഹൃദ സദസ്സും നടക്കും. എഴുത്തുകാരനും സിനിമാ പ്രവർത്തകനുമായ മധുപാൽ വിശിഷ്ടാതിഥിയായി പങ്കെടുക്കും. ഡോ. പി.വി. ധന്യ രചിച്ച ‘വിളക്കിന്റെ കാവലാൾ’ എന്ന നോവലിന്റെ രണ്ടാം പതിപ്പ് ചടങ്ങിൽ പ്രകാശനം ചെയ്യും. കൈരളി ബുക്സ് എം.ഡി. ഒ. അശോക് കുമാർ ചടങ്ങിൽ സാന്നിധ്യമായിരിക്കും. തുടർന്ന് സംഗീതാർച്ചന, നൃത്താവിഷ്കാരങ്ങൾ, തിരുവാതിര എന്നിവയും ഉണ്ടായിരിക്കും.
സമാപനം: ഒക്ടോബർ 21-ന് ബുധനാഴ്ച രാവിലെ വിദ്യാരംഭ ചടങ്ങുകളോടെ ഈ വർഷത്തെ നവരാത്രി സാംസ്കാരികോത്സവം സമാപിക്കും.
