കൊച്ചി: പ്രതിപക്ഷ നേതാവ് വി.ഡി. സതീശനെതിരെ അതിരൂക്ഷമായ ഭാഷയിൽ വിമർശനവുമായി എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. വി.ഡി. സതീശന് വട്ടാണെന്നും അദ്ദേഹത്തെ ഊളമ്പാറയിൽ കൊണ്ടുപോയി ചികിൽസിക്കണമെന്നും വെള്ളാപ്പള്ളി പരിഹസിച്ചു. സതീശൻ ഒരു ഈഴവ വിരോധിയാണെന്നും അദ്ദേഹം ആരോപിച്ചു.
ലീഗിനെ പ്രീണിപ്പിക്കുന്നു:
മുസ്‌ലിം ലീഗിനെ പ്രീണിപ്പിച്ച് അധികാരസ്ഥാനം നേടുകയാണ് സതീശന്റെ ലക്ഷ്യം. യു.ഡി.എഫ് അധികാരത്തിൽ എത്തിയാൽ ഭരിക്കുക മുസ്‌ലിം ലീഗ് ആയിരിക്കും. പിന്നാക്കക്കാരനായ മുഖ്യമന്ത്രി തന്നെ കാറിൽ കയറ്റിയത് സതീശന് ഇഷ്ടമായില്ല. മുഖ്യമന്ത്രിയുമായി കാറിൽ യാത്ര ചെയ്തതിനെ പ്രതിപക്ഷം വലിയ വിവാദമാക്കിയതിനോട് പ്രതികരിക്കുകയായിരുന്നു അദ്ദേഹം.
എൻ.എസ്.എസുമായി സഹകരണം:
എൻ.എസ്.എസുമായി യോജിച്ച് പോകാൻ എസ്.എൻ.ഡി.പി തയ്യാറാണെന്നും വെള്ളാപ്പള്ളി വ്യക്തമാക്കി. ഇതുമായി ബന്ധപ്പെട്ട സഹകരണം ചർച്ച ചെയ്യാൻ ജനുവരി 21-ന് എസ്.എൻ.ഡി.പി നേതൃയോഗം ചേരും. സംഘടനയെ തകർക്കാൻ ശ്രമിക്കുന്ന ‘കുലംകുത്തികൾ’ കൂട്ടത്തിലുണ്ടെന്നും അദ്ദേഹം വിമർശിച്ചു.
