ന്യൂഡൽഹി: മുതിർന്ന കോൺഗ്രസ് നേതാവും മുൻ കേന്ദ്രമന്ത്രിയുമായ മൊഹ്സിന കിദ്വായി (94) അന്തരിച്ചു. ഇന്ദിരാ ഗാന്ധി, രാജീവ് ഗാന്ധി സർക്കാരുകളിൽ സുപ്രധാന വകുപ്പുകൾ കൈകാര്യം ചെയ്തിരുന്ന ഇവർ കോൺഗ്രസ് പാർട്ടിയുടെ സംഘടനാ തലത്തിലും ഉന്നത സ്ഥാനങ്ങൾ വഹിച്ചിട്ടുണ്ട്.
• 1930 ജനുവരി ഒന്നിന് ഉത്തർപ്രദേശിലെ ബാരബാങ്കിയിലായിരുന്നു ജനനം. 1977-ൽ മീററ്റിൽ നിന്ന് ലോക്സഭയിലെത്തിയ അവർ, ഏഴ്, എട്ട് ലോക്സഭകളിലും അംഗമായി. 2004 മുതൽ 2016 വരെ ഛത്തീസ്ഗഢിൽ നിന്നുള്ള രാജ്യസഭാ എം.പിയായും പ്രവർത്തിച്ചു. ഉത്തർപ്രദേശ് സർക്കാരിൽ ഭക്ഷ്യ-സിവിൽ സപ്ലൈസ്, സാമൂഹികക്ഷേമം തുടങ്ങിയ വകുപ്പുകളിലും മന്ത്രിയായിരുന്നു.
• 1982-ൽ കേന്ദ്രമന്ത്രിപദത്തിലെത്തിയ മൊഹ്സിന കിദ്വായി തൊഴിൽ, ആരോഗ്യം-കുടുംബക്ഷേമം, ഗ്രാമവികസനം, ഗതാഗതം, നഗരവികസനം തുടങ്ങിയ വകുപ്പുകൾ വിവിധ കാലയളവുകളിൽ കൈകാര്യം ചെയ്തു. എ.ഐ.സി.സി ജനറൽ സെക്രട്ടറിയായും കോൺഗ്രസ് പ്രവർത്തകസമിതി അംഗമായും പ്രവർത്തിച്ച ഇവർ കേരളത്തിന്റെ സംഘടനാ ചുമതലയും വഹിച്ചിട്ടുണ്ട്. സോണിയാ ഗാന്ധിയുടെ അടുത്ത അനുയായി കൂടിയായിരുന്നു അവർ.
• ഖലീൽ ആർ. കിദ്വായിയാണ് ഭർത്താവ്. മൂന്ന് പെൺമക്കളുണ്ട്. നോയിഡയിലെ വസതിയിൽ നിന്ന് വൈകിട്ട് മൂന്നുമണിയോടെ ആരംഭിക്കുന്ന അന്ത്യയാത്രയ്ക്ക് ശേഷം അഞ്ചുമണിയോടെ സംസ്കാര ചടങ്ങുകൾ നടക്കും.
