മുംബൈ: മഹാരാഷ്ട്ര ഉപമുഖ്യമന്ത്രിയും എൻ.സി.പി നേതാവുമായ അജിത് പവാർ (66) വിമാനാപകടത്തിൽ അന്തരിച്ചു. ബരാമതിയിൽ വെച്ചുണ്ടായ വിമാനാപകടത്തിലാണ് അദ്ദേഹം അന്തരിച്ചത്. അജിത് പവാറിനൊപ്പം വിമാനത്തിലുണ്ടായിരുന്ന സുരക്ഷാ ഉദ്യോഗസ്ഥൻ, സഹായി, പൈലറ്റ്, ജീവനക്കാരൻ എന്നിങ്ങനെ നാലുപേരും അപകടത്തിൽ മരണപ്പെട്ടു.
• ഇന്ന് രാവിലെ മുംബൈയിൽ നിന്നും ബരാമതിയിലേക്ക് സ്വകാര്യ വിമാനത്തിൽ പോകുമ്പോഴായിരുന്നു അപകടം. ലാൻഡിംഗിന് തൊട്ടുമുമ്പ് രാവിലെ 8.45-ഓടെ വിമാനം തകർന്നു വീഴുകയും പൂർണ്ണമായും കത്തിനശിക്കുകയും ചെയ്തു. വിമാനം താഴെ വീണ ഉടൻ പൊട്ടിത്തെറിച്ചതായി ദൃക്സാക്ഷികൾ പറയുന്നു. ഉടൻ തന്നെ രക്ഷാപ്രവർത്തനം നടത്തിയെങ്കിലും ആരുടെയും ജീവൻ രക്ഷിക്കാനായില്ല. അപകടത്തെത്തുടർന്ന് ബരാമതി വിമാനത്താവളത്തിന്റെ പ്രവർത്തനം താൽക്കാലികമായി നിർത്തിവെച്ചു.
• മഹാരാഷ്ട്ര രാഷ്ട്രീയത്തിലെ അതികായനായ അജിത് പവാർ ആറ് സർക്കാരുകളിൽ ഉപമുഖ്യമന്ത്രിയായി സേവനമനുഷ്ഠിച്ചിട്ടുണ്ട്. ഒരു തിരഞ്ഞെടുപ്പിൽ പോലും തോൽക്കാത്ത അദ്ദേഹം എട്ട് തവണ നിയമസഭയിലേക്കും ഒരു തവണ ലോക്സഭയിലേക്കും തിരഞ്ഞെടുക്കപ്പെട്ടു. അദ്ദേഹത്തിന്റെ അപ്രതീക്ഷിത വേർപാടിൽ പ്രധാനമന്ത്രി ഉൾപ്പെടെയുള്ള പ്രമുഖ നേതാക്കൾ അനുശോചനം രേഖപ്പെടുത്തി.
