ഷാർജ: പിതാവിനെ കാണാൻ നാട്ടിൽ നിന്ന് സന്ദർശക വിസയിലെത്തിയ രണ്ടു വയസ്സുകാരൻ ഷാർജയിൽ വാഹനാപകടത്തിൽ മരിച്ചു. മലപ്പുറം ചട്ടിപ്പറമ്പ് നെല്ലോളി സ്വദേശി ഷറഫുദ്ദീന്റെയും സഫ്നയുടെയും മകൻ അലൻ റൂമിയാണ് മരിച്ചത്. ബുധനാഴ്ച വൈകുന്നേരം താമസസ്ഥലത്തിന് സമീപം വെച്ചായിരുന്നു അപകടം.
• ഷാർജയിലെ തലാൽ ഗ്രൂപ്പ് സ്ഥാപനത്തിൽ സെയിൽസ്മാനായി ജോലി ചെയ്യുന്ന ഷറഫുദ്ദീനെ കാണാനായി കഴിഞ്ഞ മാസം 18-നാണ് അലൻ മാതാവിനൊപ്പം യുഎഇയിൽ എത്തിയത്. രണ്ട് മാസത്തെ സന്ദർശക വിസയിൽ എത്തിയതായിരുന്നു കുഞ്ഞ്. താമസസ്ഥലത്തിന് സമീപത്ത് വെച്ച് കാറിടിച്ചാണ് അപകടമുണ്ടായത്.നിയമനടപടികൾ പൂർത്തിയാക്കി മൃതദേഹം വ്യാഴാഴ്ച ദുബൈ ഖിസൈസ് ഖബർസ്ഥാനിൽ ഖബറടക്കി.
